Online seller, naiyak matapos malamang nakapasa sa LET habang nagla-live selling sa Facebook

Naiyak sa tuwa ang online seller na si Jerlyn Esteves na taga Masbate City matapos malamang siya ay nakapasa sa Licensure Examination for Teachers.

Kasalukuyang nagla-live selling si Jerlyn nang batiin siya ng kanyang mga buyer at sabihing nakapasa siya sa LET. Noong una ay hindi pa naniwala si Jerlyn dahil ayon sa kanya ay hindi siya masyadong nakapag-focus dito dahil busy siya sa kanyang mga paninda.

Dahil hindi makapaniwala, hiningian pa nito ang mga bumabati sa kanya ng patunay na nakapasa nga siya sa nasabing examination. Kaya naman nang i-send ang larawan kung saan kabilang ang kanyang pangalan sa mga nakapasa, hindi na ito magkamayaw at nag-iiyak na sa tuwa.

"Walang review-review dahil super busy sa small business, pinaubaya ko kay God ang pag-exam ko, before pa nga makapag-exam grabe pa ang pinagdaanan ko," saad nito.

Sa isang panayam, nabanggit ni Jerlyn Esteves na hindi ito ang unang pagkakataon na nag-take siya ng LET. Ayon sa kanya noong 2019 ay todo review siya bago sumabak sa exam ngunit hindi siya nakapasa. Ngayong hindi siya nag-review saka naman ibinigay sa kanya ang pagiging ganap na guro.

"Kahit sobrang preparado ka sa exam, kung hindi pa para sa 'yo, 'di pa ibibigay. Pero kung time mo na talaga, kahit 'di mo alam ang sinagot mo doon, pagdating kay Lord, pasado ka," pagbabahagi nito.

Kaya naman ganoon na lamang ang pasasalamat ni Jerlyn sa mga taong hindi napagod na sumuporta sa kanya. Hindi raw madali ang kanyang mga napagdaanan ngunit nasisiguro siya na worth it ito lahat.

Panoorin ang video :